Prayer during the Year of Jubilees, Ilocano

Kararag iti Tawen dagiti Jubileo

(makararag iti amin a Misa iti Tawen dagiti Jubileo)

Santissima Trinidad, Ama, Anak ken Espiritu Santo, gubbuayan ti amin a biag ken kinasanto
Daydayawendaka gapu iti panangitedmo kadakami ni San Pablo,
napinget nga Apostol ken martir gapu iti ayatna ken Kristo.

Kas iti panangpabilegmo ken San Pablo, ikkannakam met kadi ti naun-uneg a pammati, napadegdeg a namnama, ken gumilgil-ayab nga ayat para ken Kristo nga Apomi tapno kas ken San Pablo, maiwaragawagmi a sitatalged, “Saan nga siakon ti agbibiag, nu di ket ni Kristo ti agbibiag kaniak.”

Kas iti panangibaonmo kenkuana, tulongannakami nga agbalin nga apostoles nga agserbi iti Simbaan iti natarnaw a puso, mangsaksi iti kinapudno ken kinapintas daytoy a Simbaan,
iti baet ti kinasipnget ti tiempomi.

Agyamankami, Ama, Anak ken Espiritu Santo, Apo ti Pakasaritaanmi
Bayat iti panangrambakmi iti sagutmo a Simbaan Lokalmi, ti Nueva Segovia.

Bayat iti panagdaliasatmi kadagiti lawag ken sipnget ti biag-simbaanmi, dawatenmi nga akayennakami iti dalan ti panagbalbaliw, tapno maaddaankam ti napabaro a puso,
Ken nauneg a panagbalbaliw, tapno iti wagas ti panagbiagmi maiyannurot met laeng iti Ebanghelio
Ken tapno itrabahomi iti pannakawayawaya manipud iti basol ken dagiti istraktura ti basol a mangtaginayon ti kinapanglaw, pannanggundaway ken kinaawan ti hustisya.

Dawatenmi ta iturongnakam iti dalan ti pannakapabaro, tapno ikomitmi ti aminmi a mangitrabaho iti panagbalin dagiti istraktura ti basol nga istraktura ti grasya ken pannakawayawaya

Ken tapno itrabahomi ti pannakapabaro ti istraktura ti Simbaan ken Kagimongan tapno iwardasda ti pudno a kinatan-ok ti tao, agserbida iti pagimbagan ti amin, ken idiayada kadagiti tattao ti parabur ti pagarian ti Dios – biag nga awan pagkuranganna.

Dawatenmi ta pabilgennakami a mangikomit manen ti aminmi iti napabaro a panangiwaragawag ti Naimbag a Damag babaen ti napabaro a katesismo, iti naisangsangayan a wagas para kadagiti agtutubo ken babaen kadagiti nadumaduma a sangal ti media, babaen ti napabaro a panagrukbak, ken babaen ti napabaro nga apostolado para iti kagimongan, social action.

Dawatenmi ta idalannakam nga agmisyon iti kagimongan, ken kadagiti kakabsat a saan pay a nakaam-ammo ken Apo Jesus, wenno nakurang pay ti panakammoda kenkuana, wenno kadagiti saan pay a nalitup ti pannakaikamengda iti Simbaan a binuangayna.

Manangaasi nga Ama, idumogmi dagiti ulomi a sibababawi bayat iti panangikompesar ken panangsangomi iti kinamanagbasolmi, kasta met iti kinamanagbasol dagiti istraktura a dakami met laeng ti nangipasdek – sapasap a kinapanglaw, nakillo a politika, bumabbaba a moralidad, ken saan a napauneg a relihiyon.

Espiritu ti Ayat, padegdegem kadakami ti gagar ken tibker ti pammati, pagbalinennakam a pudpudno a Simbaan Lokal, ket isagutmo kadakami ti napabaro a gagar a mangitungpal iti misyon ti napabaro a panangiwaragawag ti Naimbag a Damag.

Managayat a Jesus, italekmi kenka amin a gandatmi tapno agbalin kam a napudpudno a senyal ken instrumento ti Pagariam bayat iti panangtuntonmi ti grasya daytoy a tawen ti Jubileo, baben ti panangibabaet ni San Pablo, Apostol kadagiti Gentil, ken ti panangkadkadwa ti Inam a ni Maria, Apo Caridad, isu nga intedmo kadakam nga Inami.

Daydayawendaka Dios Ama, Dios Anak, ken Dios Espiritu Santo ita ken ti agnanayon. Amen.